Majalisar Wakilan Amurka Ta Kada Kuri’ar Dakatar da Yaƙin Iran, ’Yan Republican 7 Sun Goyawa Kuri’ar Baya

Majalisar Wakilan Amurka ta kada kuri’ar neman kawo ƙarshen yaƙin da Amurka ke yi da Iran, bayan ta amince da wani kudurin dokar ikon yaƙi da zai takaita damar Shugaba Donald Trump na ci gaba da ayyukan soji ba tare da amincewar Majalisa ba.

Kudurin ya samu kuri’u 220 zuwa 204, inda dukkan ’yan Democrat da kuma ’yan Republican bakwai suka goyi bayansa. Uku daga cikin ’yan Republican da suka kada kuri’ar amincewa sun yi hakan ne a karon farko.

Dan Majalisar Wakilan Amurka daga Iowa, Zach Nunn, ya bayyana cewa ya goyi bayan kudurin ne saboda ci gaba da ayyukan soji na bukatar amincewar Majalisa.

Nunn ya ce: “Ba zan goyi bayan wani yaƙi mara iyaka ba.”

Sai dai kudurin na fuskantar cikas, domin makamantan kudurorin da aka gabatar a baya ba su kai ga teburin shugaban ƙasa ba. Idan kudurin ya isa wurin Trump, ana sa ran zai yi amfani da ikon veto wajen dakatar da shi.

Dan Republican Brian Mast, shugaban Kwamitin Harkokin Wajen Majalisar Wakilan Amurka, ya kare matakin gwamnatin Trump, yana mai cewa Iran na ci gaba da kasancewa barazana ga Amurka.

Kuri’ar ta zo ne yayin da ’yan majalisar ke shirin komawa jihohinsu domin yakin neman zaɓe gabanin zaɓen tsakiyar wa’adin mulki na Amurka. Batun yaƙin Iran ya zama ɗaya daga cikin muhimman batutuwan da ake tattaunawa a yakin neman zaɓen.

Wani rahoto daga Congressional Budget Office (CBO) ya bayyana cewa yaƙin da aka shafe watanni shida ana yi ya janyo kashe kusan dala biliyan 38, kuma ana sa ran kuɗin yaƙin zai ƙaru da kusan dala biliyan 3 a kowane wata.

Rahoton ya kuma ce rikicin na iya ƙara hauhawar farashin kayayyaki a Amurka da maki 0.5 cikin 100 a cikin watanni uku na farko na shekarar 2027.

Wannan shi ne karo na uku da Majalisar Wakilan Amurka ta kada irin wannan kuri’a. A watan Yuni da Yuli ma ta amince da makamantan kudurori, yayin da Majalisar Dattawa ita ma ta yi ƙoƙarin takaita ikon gwamnatin wajen ci gaba da ayyukan soji.

A ƙarƙashin kundin tsarin mulkin Amurka, Majalisa ce ke da ikon ayyana yaƙi, yayin da shugaban ƙasa ke matsayin babban kwamandan sojoji. Dokar War Powers Act, wadda aka kafa bayan Yaƙin Vietnam, ta tanadi iyaka kan tsawaita ayyukan soji ba tare da amincewar Majalisa ba.

Yadda Marigayi Dan Shagamu Ya nemi taimakon Hukumomi Kan Barazanar Kisa Kafin A Kashe Shi.

Bayanai sun nuna cewa, Marigayi Ibrahim Khalil Dan Shagamu, mai sharhi a kafafen sada zumunta a jihar Kano, ya taba bayyana cewa ana yi masa barazanar kisa makonni kadan kafin a kashe shi a gidansa da ke Gaida, Karamar Hukumar Kumbotso ta Jihar Kano.

Dan Shagamu, mai shekaru 54, ya roki Gwamnatin Jihar Kano, Sarkin Kano da rundunar ‘yan sanda da su shiga tsakani, yana zargin cewa wasu makwabtansa na ci gaba da tsangwamarsa tare da yi masa barazana.

A wani faifan bidiyo da ya wallafa a shafinsa na sada zumunta, ya ce yana bukatar taimakon gwamnan Kano, Sarkin Kano da ‘yan sanda saboda yana fuskantar barazanar kisa daga makwabtansa.

Ya kuma zargi wasu yara da ke unguwar da jifan gidansa da duwatsu, lalata talabijin dinsa da kuma taruwa a wajen gidansa suna zaginsa.

A cewarsa, ya kai rahoton lamarin ga shugaban unguwar Gaida, wanda daga bisani ya tura batun zuwa shugaban Ja’en, amma matsalar ba ta samu mafita ba.

Dan Shagamu ya kuma yi zargin cewa wasu daga cikin makwabtansa sun san da barazanar da ake yi masa kuma sun hada baki a kansa.

Ya kuma wallafa wani bidiyo da ke nuna wasu yara a wajen gidansa, inda ya ce an ji suna yi masa barazanar kashe shi.

Wannan gargadi da ya taba yi ya sake daukar hankalin jama’a bayan rasuwarsa a safiyar Laraba.

‘Yan uwansa sun ce wasu mutane da ba a san ko su waye ba sun kutsa cikin gidansa tare da kashe shi.

Rundunar ‘yan sandan Jihar Kano ta tabbatar da kama mutane biyu da ake zargi da hannu a kisan, yayin da bincike ke ci gaba da gudana.

Sai dai Kakakin rundunar ‘yan sandan jihar, CSP Abdullahi Haruna Kiyawa, ya ce binciken farko bai nuna cewa kisan yana da alaka da ayyukan Dan Shagamu a kafafen sada zumunta ba.

A cewar kakakin ‘yan sandan, binciken farko ya nuna cewa lamarin na iya kasancewa sakamakon abin da ya kira “tsananin hassada da kiyayya daga makwabta.”

Dan Shagamu, wanda ya yi suna a karkashin sunan Dan Shagamu International, ya kasance yana wallafa bidiyoyi da sharhi kan siyasa, addini da al’amuran al’umma.

Ya kasance mai tsananin sukar gwamnatin Shugaba Bola Ahmed Tinubu, sannan ya yi amfani da shafinsa wajen tallata wasu ‘yan siyasa na adawa, ciki har da tsohon Mataimakin Shugaban Kasa, Atiku Abubakar, wanda ya taba bayyana a matsayin “Shugaban Kasa mai zuwa.”

Sharhinsa ya kuma shafi batutuwan addini da rikice-rikicen da suka shafi wasu malaman addinin Musulunci a Kano da sauran batutuwan da suka shafi al’umma.

Yanzu dai rokon da Dan Shagamu ya yi a bainar jama’a na neman kariya daga barazanar da ya ce yana fuskanta daga makwabtansa ya sake daukar sabon salo bayan kashe shi.

Hukumomi na ci gaba da bincike domin gano hakikanin abin da ya jawo kisan da kuma wadanda ke da hannu a lamarin.

Source: Dailytrust

Yadda Hotunan Tauraron Dan Adam Suka Bayyana Mummunar Barnar Ambaliyar Ƙasar Nepal da Yankin Tibet na ƙasar China.

Akalla mutane 359 ne aka tabbatar da mutuwarsu, yayin da ake ci gaba da neman sama da 1,300 a Nepal da yankin Tibet na ƙasar China, bayan mummunar ambaliyar ruwa da rushewar kankara ta haddasa a tsaunukan Himalaya.

Lamarin ya faru ne ranar Laraba, lokacin da wani babban yanki na kankara da duwatsu ya rabu a wani wuri mai tsayi a yankin Tibet, lamarin da ya toshe kogin Lhende na wani lokaci. 

Bayan katangar ta rushe, wata babbar kwararar ruwa mai dauke da laka da duwatsu da tarkace ta mamaye garuruwa da kauyuka da ke kusa da iyakar Nepal da Tibet.

Gundumar Rasuwa da ke arewacin Nepal na daga cikin wuraren da suka fi fama da barnar. Ambaliyar ta lalata gidaje da cibiyoyin samar da wutar lantarki da hanyoyi da gadoji, yayin da garuruwan Timure da Syapru Besi suka fuskanci mummunar barna.

Mahukunta sun ce akalla gadoji 19 da kusan kilomita 40 na hanyoyi sun lalace, lamarin da ya kara wahalar da aikin ceto. Kakakin rundunar ‘yan sandan Nepal, Abi Narayan Kafle, ya gargadi cewa adadin wadanda suka mutu na iya karuwa yayin da jami’an ceto ke ci gaba da neman wadanda suka tsira.

Hotunan tauraron dan adam da aka dauka kafin da bayan ambaliyar sun nuna girman barnar, inda aka ga gine-gine da hanyoyi sun shafe, yayin da manyan sassan garin Syapru Besi suka nutse cikin laka.

A Tibet kuma, yankin Gyirong Port ya fuskanci mummunar ambaliyar laka. Kafofin yada labaran kasar China sun ruwaito cewa laka ta kai zurfin sama da mita 1.5 a wasu wurare, yayin da wasu sassan hanyoyi suka nutse karkashin tarkace masu zurfin sama da mita biyu.

Da farko an yi zargin cewa girgizar kasa mai karfin 4.4 ce ta haddasa lamarin. Sai dai Hukumar Binciken Yanayin Kasa ta Amurka (USGS) ta bayyana daga baya cewa girgizar da aka samu ta samo asali ne daga zaftarewar kasa, wadda ta haifar da girgizar da ta yi daidai da makamashin 5.2.

Ruwan ambaliyar ya bi daga kogin Lhende Khola zuwa kogunan Bhotekoshi da Trishuli. Jami’an Nepal sun ce matakin ruwan kogin Trishuli ya tashi da kusan mita tara cikin mintuna 30 kacal.

Ambaliyar da tarkacen laka sun kuma isa yankunan da ke nesa daga inda lamarin ya fara. An gano gawarwaki a wasu gundumomi da suka hada da Gorkha da Tanahunda Chitwan da Nawalparasi.

Kungiyoyin ceto na ci gaba da neman mutanen da suka bace, amma lalacewar hanyoyi da gadoji, tare da yanayin tsaunukan Himalaya mai wahala, na kara kawo cikas ga ayyukan ceto da agajin gaggawa.

Tsohon Janar na sojan Bosnia, Ratko Mladic, Wanda ya Jagoranci kisan kiyashin Musulman Bosnia 8,000 a 1995 ya mutu.

Tsohon kwamandan sojojin Serb na Bosnia, Ratko Mladic, wanda aka samu da laifin kisan kare dangi da laifukan yaki da kuma laifukan cin zarafin bil’adama, ya rasu yana da shekaru 83.

Rahotanni sun ce Mladic ya rasu ne a wani asibitin kurkukun Majalisar Dinkin Duniya (UN) da ke birnin Hague na ƙasar Netherlands. Gidan talabijin na Serbia da na Serb na Bosnia sun bayar da rahoton rasuwar, yayin da wani jami’in Majalisar Dinkin Duniya ya tabbatar da ita.

An yanke wa Mladic hukuncin daurin rai da rai a shekarar 2017, bayan an same shi da hannu a wasu munanan laifuka da aka aikata a lokacin yakin Bosnia na shekarar 1992 zuwa 1995.

An same shi da laifin kisan kare dangi saboda rawar da ya taka a kisan kiyashin Srebrenica na shekarar 1995, inda aka kashe sama da Musulman Bosnia 8,000, musamman maza da yara maza.

Mladic, wanda aka fi sani da “Mahaucin Bosnia”, ya shafe shekarun ƙarshe na rayuwarsa a gidan yari bayan kotun ƙasa da ƙasa ta same shi da alhakin wasu daga cikin manyan laifukan cin zarafin bil’adama da aka aikata a Turai tun bayan Yaƙin Duniya na Biyu.

Rasuwarsa ta kawo ƙarshen rayuwar ɗaya daga cikin fitattun mutanen da aka gurfanar a gaban kotun ƙasa da ƙasa bisa zargin aikata manyan laifukan yaki a Bosnia.

Ambaliyar Ruwa Ta Kashe Mutane 180 a Nepal, Yayin da Wasu Mutum 1,400 Suka Bace.

Iyalan daruruwan mutane a Nepal na ci gaba da neman ‘yan uwansu da suka ɓace bayan wata mummunar ambaliyar ruwa ta afkawa sassan Ƙasar da yankin Tibet, inda aka tabbatar da mutuwar kusan mutane 180, yayin da akalla wasu 1,400 ba a san inda suke ba.

Ana zargin ambaliyar ta samo asali ne daga fashewar wani tafkin kankara a Tibet, wanda ya haifar da kwararar ruwa mai ƙarfi zuwa yankunan da ke ƙasa. Ruwan ya mamaye garuruwa da ƙauyuka tare da lalata gidaje, makarantu, hanyoyi, gadoji da tashoshin samar da wutar lantarki.

A gundumar Nuwakot, mazauna yankin sun bayyana yadda ambaliyar ta share gidaje da gonaki gaba ɗaya. Wani mazaunin yankin ya ce wuraren da a baya suke cike da gidaje da gonakin noma sun koma kufai.

‘Yan sandan Nepal sun ce tawagogin ceto sun gano gawarwaki 95 zuwa yammacin Laraba, amma ana sa ran adadin wadanda suka mutu zai ƙaru yayin da masu aikin ceto ke isa wuraren da ambaliyar ta fi yin barna.

Daga cikin mutanen da ake nema akwai jami’an ‘yan sanda, ma’aikatan gwamnati, injiniyoyin tashoshin wutar lantarki da masu yawon buɗe ido. Haka kuma, ana zargin wasu ‘yan yawon buɗe ido daga Indiya da ke kan hanyar zuwa Tibet domin gudanar da aikin hajjin Kailash Mansarovar suna cikin wadanda suka ɓace.

Gwamnatin Nepal ta ce ambaliyar ta lalata gadojin ababen hawa guda 19 da kuma kusan kilomita 43 na manyan hanyoyin da ke haɗa yankunan da abin ya shafa.

An sanya gundumomin Rasuwa, Nuwakot, Dhading, Gorkha da Chitwan cikin yanayin taka-tsantsan, yayin da hukumomi suka gargadi jama’a da su nisanci koguna saboda yiwuwar sake samun ambaliyar ruwa.

A Kathmandu, wasu iyalai na yawan zuwa asibitoci domin neman ‘yan uwansu da suka ɓace. Wasu daga cikinsu sun ce sun rasa tuntuba da ‘yan uwansu tun bayan da ambaliyar ta lalata hanyoyin sadarwa.

Firaministan Nepal ya yi kira ga ‘yan ƙasar da su haɗa kai domin tallafa wa ayyukan ceto da agaji. Indiya ma ta bayyana shirinta na bayar da tallafin jinƙai domin taimakawa Nepal wajen tunkarar wannan mummunar annoba.

Tinubu ya yi kira ga musulmi su yi koyi da kyawawan halayen Annabi Muhammad (SAW).

Shugaban Ƙasar Najeriya, Bola Tinubu ya taya al’ummar Musulmi murnar bikin Eid-el-Maulud na bana, inda ya bukaci Musulmi da su yi koyi da kyawawan koyarwa da halayen Annabi Muhammad (SAW).

Mai ba Shugaban Ƙasa shawara na musamman kan yaɗa labarai da dabarun sadarwa, Bayo Onanuga, ne ya bayyana hakan a cikin wata sanarwa da ya sanya wa hannu a ranar Talata mai taken, “Eid-el-Maulud: Tinubu Ya Bukaci Musulmi Su Yi Koyi da Kyawawan Halayen Annabi Muhammad.”

Tinubu ya ce bikin Maulud bai kamata ya tsaya kawai ga tunawa da ranar haihuwar Annabi Muhammad (SAW) ba, ya kamata Musulmi su yi amfani da lokacin wajen yin nazari kan rayuwarsu, addu’a da kuma koyon kyawawan halayen Manzon Allah.

Ya bukaci Musulmi su himmatu wajen bin koyarwar Annabi Muhammad (SAW), musamman darussan ibada, juriya, haƙuri, tawali’u da sadaukar da kai.

Shugaban Ƙasar ya kuma yi kira ga malaman addinin Musulunci da su yi amfani da wannan lokaci wajen yi wa Najeriya addu’a tare da jan hankalin mabiyansu su aiwatar da darussan da suka koya daga rayuwar Annabi Muhammad (SAW) wajen nuna kishin ƙasa da biyayya.

Tinubu ya kuma roƙi Musulman da ke gudanar da bikin Maulud da su taimaka wa mabukata da marasa ƙarfi, domin nuna tausayi da haɗin kai a lokacin bikin.

Haka kuma, Shugaban Ƙasar ya yi kira da a yawaita addu’o’i domin kawo ƙarshen matsalar rashin tsaro da sauran ƙalubalen da ke addabar wasu sassan ƙasar.