Alƙalin Amurka Ya Umurci A Saki Mai Rajin Kare Haƙƙin Falasɗinawa Da hukumar ICE Ta Tsare.

Wani alƙali a Amurka ya bayar da umarnin a saki Salah Sarsour, wani jagoran Musulmi kuma mai fafutukar kare haƙƙin Falasɗinawa, wanda hukumomin shige da fice na ƙasar suka tsare.

Sarsour, shugaban ƙungiyar Musulunci ta Milwaukee, ya ce an tsare shi ne saboda ra’ayoyinsa da kuma goyon bayan da yake bai wa Falasɗinawa. An riƙe shi na kusan watanni uku bayan hukumar ICE ta kama shi.

Alƙali James Patrick Hanlon ya ce Sarsour ya gabatar da hujjoji masu ƙarfi cewa an kama shi ne saboda furucin da kundin tsarin mulkin Amurka ya kare na ’yancin faɗar albarkacin baki.

Alƙalin ya ƙi amincewa da hujjar cewa batun tsaron ƙasa zai iya kawar da haƙƙin mutum na yin magana, yana mai cewa dole gwamnati ta mutunta dokokin kundin tsarin mulki.

Bayan an sake shi, Sarsour ya bayyana farin cikinsa, yana cewa hukuncin nasara ne ga ’yancin faɗar ra’ayi.

“Na ji daɗin komawa wajen iyalina,” in ji shi.

Hukumomin Amurka sun zarge shi da wasu laifukan shige da fice, ciki har da zargin rashin bayyana wani tsohon hukunci da kotun sojin Isra’ila ta yanke masa, amma ya musanta zargin.

Ƙungiyoyin kare haƙƙin ɗan Adam sun yi Allah-wadai da tsare shi, suna cewa lamarin na cikin wani babban matakin takura wa masu goyon bayan Falasɗinawa a Amurka.

Wannan shari’a ta ƙara tayar da muhawara a Amurka kan shige da fice da tsaron ƙasa, da kuma iyakar ’yancin faɗar ra’ayi.

• Tweet
• Share
• Share
• Share
• Share