Ana sa ran wakilai daga kasashe sama da 100 za su halarci jana'izar tsohon Jagoran Addinin Iran, Ayatullah Ali Khamenei, wadda za a gudanar a birnin Tehran ranar Juma'a, kamar yadda kafafen yada labaran gwamnatin Iran suka bayyana.
An kashe Khamenei yana da shekara 86 a wani harin sama da Amurka da Isra'ila suka kai ranar 28 ga Fabrairu. Za a gudanar da zaman makoki da jana'izarsa na tsawon kwanaki bakwai a Iran da kuma Iraki, yayin da babban taron jana'izar zai gudana a Tehran.
Daga cikin manyan shugabannin da suka tabbatar da halarta akwai Firaministan Pakistan, Shehbaz Sharif da Shugaban Tajikistan, Emomali Rahmon da Firaministan Armenia, Nikol Pashinyan da Shugaban Georgia, Mikheil Kavelashvili.
Haka kuma kasashe da dama za su aika manyan jami'an gwamnati. Indiya za ta samu wakilcin Karamin Ministan Harkokin Waje, Pabitra Margherita, da Gwamnan Jihar Bihar, Syed Ata Hasnain, tare da wasu fitattun 'yan adawa.
Rasha za ta aika da tsohon Shugaban ƙasar Dmitry Medvedev, yayin da China da Turkiyya da Afghanistan da Bangladesh su ma suka tabbatar da tura manyan wakilai.
Bayan taron ranar Juma'a, za a ci gaba da zaman makoki a Tehran kafin a wuce da jerin jana'izar zuwa biranen Qom na Iran da Najaf da Karbala na Iraki.
Daga bisani za a binne Khamenei a harabar Hubbaren Imam Reza da ke Mashhad, garin da aka haife shi.
Mahukuntan Iran sun ce ana sa ran jana'izar za ta kasance cikin mafi girman tarukan jana'iza a tarihin zamani, tare da yiwuwar ta zarce jana'izar Ayatullah Ruhollah Khomeini da aka gudanar a shekarar 1989.
A halin da ake ciki, rundunar sojin Iran ta gargadi Amurka da Isra'ila da su guji daukar duk wani matakin soja yayin zaman makokin, tana mai cewa duk wani hari zai fuskanci martani mai tsanani daga Iran.
Haka kuma jami'an Iran sun bayyana cewa ɗan Khamenei kuma Jagoran Addini na yanzu, Mojtaba Khamenei, ba zai halarci jana'izar ba saboda dalilan tsaro bayan rahotannin barazanar kashe shi.
.jpeg)
.jpeg "Sunayen kofofin aljanna guda takwas 8")
0 Comment about the Post: