Yawan Mutanen Da Suka Mutu A Girgizar Ƙasar Venezuela Ya Haura 900 Yayin Da Ake Ci Gaba Da Ceto Wadanda Suka Tsira.

Masu aikin ceto da masu aikin sa kai a Venezuela na ci gaba da neman wadanda suka tsira bayan mummunar girgizar ƙasar da ta kashe sama da mutane 900 tare da barin dubban mutane cikin rashin tabbas.

Gwamnatin Venezuela ta bayyana cewa akalla mutane 920 ne suka mutu, yayin da mutane 3,360 suka jikkata, kuma sama da mutane 50,000 aka ruwaito sun ɓace bayan girgizar ƙasa biyu masu ƙarfi da suka faru ranar Laraba.

A ranar Juma’a kuma, wata sabuwar girgizar ƙasa mai ƙarfin 4.9 ta sake girgiza wasu sassan ƙasar, lamarin da ya ƙara tayar da hankali tsakanin mazauna yankunan da abin ya shafa.

A yankunan da suka fi lalacewa kamar La Guaira, mazauna garuruwa da jami’an ceto suna ci gaba da tono baraguzan gine-gine domin gano wadanda suka makale, wasu ma suna amfani da hannuwansu saboda ƙarancin manyan kayan aiki.

Ƙungiyoyin ceto daga ƙasashe kamar Mexico da El Salvador sun isa Venezuela domin taimakawa ayyukan ceto, yayin da ake aika kayan agaji zuwa wuraren da bala’in ya fi shafa.

Mahukunta sun ce girgizar ƙasar mai ƙarfin 7.2 da 7.5 ta haddasa asara mai yawa tare da shafar miliyoyin mutane.

Bala’in ya ƙara matsa lamba ga hukumomin Venezuela yayin da suke ci gaba da aikin ceto da tallafa wa waɗanda abin ya shafa.

• Tweet
• Share
• Share
• Share
• Share