Paparoma Leo XIV Ya Ce “Dukkanmu ‘Yan Hijira Ne” a lokacin Ziyararsa a Tsibirin Canary na ƙasar Sifaniya.

Paparoma Leo XIV ya yi jawabi a Tenerife dake Tsibirin Canary a ƙasar Sifaniya, inda ya bayyana cewa dukkan mutanen duniya “‘yan hijira ne,” yayin da yake ganawa da bakin haure a cibiyar karɓarsu.

Ya bayyana hakan ne a cibiyar Las Raíces, wacce aka sauya daga tsohon sansanin soja zuwa wajen kula da bakin haure, a ƙarshen ziyararsa ta mako guda da ta mayar da hankali kan batun bakin haure.

Paparoman ya yi kira ga ƙasashe da al’umma da su ƙara nuna tausayi da taimako ga bakin haure, tare da tabbatar da cewa ana kare su daga cin zarafi da safarar mutane.

Ya kuma yi gargadi kan yadda rashin kulawa ke ƙara haddasa mace-mace a hanyoyin ƙaura na tekun Atlantika da Bahar Rum, inda mutane da dama ke rasa rayukansu.

Rahotanni sun nuna cewa kusan mutane 1,200 ne suka mutu ko suka ɓace a bara yayin ƙoƙarin tsallakawa daga Afirka zuwa Tsibirin Canary.

Ana sa ran Paparoman zai ci gaba da shirye-shiryen addu’a a Tenerife kafin ya koma Roma, sannan daga baya ya ziyarci tsibirin Lampedusa a Italiya, wani muhimmin wuri na shigowar bakin haure zuwa Turai.

• Tweet
• Share
• Share
• Share
• Share