Wani Alƙalin Kotun Shari'a a jihar Kano Ya Rasa Aiki saboda Karɓar Cin Hancin Naira Dubu 250.

Hukumar Kula da Ayyukan Shari'a ta Jihar Kano (JSC) ta yi wa Alƙalin Kotun Shari'a, Alƙali Aliyu Yahaya Muhammad, ritaya ta tilas bayan ta same shi da laifin karɓar cin hancin Naira 250,000 yayin da yake sauraron wani shari'ar farar hula.

An yanke hukuncin ne a taron Hukumar na 90 da aka gudanar a ranar 3 ga Yulin 2026 ƙarƙashin jagorancin Babban Alƙalin Jihar Kano.

A cikin wata sanarwa da kakakin Hukumar, Baba Jibo Ibrahim, ya fitar, an bayyana cewa Alƙali Aliyu Yahaya Muhammad, wanda ke aiki a Kotun Shari'a ta Babeji, ya karɓi kuɗin cin hancin ne yayin gudanar da aikinsa. Hukumar ta umurce shi da ya mayar da kuɗin Naira 250,000 tare da tura shi ritaya ta tilas.

Hukumar ta kuma hukunta magatakardan kotu, Ibrahim Ahmad Ibrahim, bayan ya amsa cewa ya karɓi wani kaso daga kuɗin cin hancin. An dakatar da shi daga aiki ba tare da albashi ba na tsawon watanni huɗu.

Hakazalika, Hukumar ta tura Muzambilu Ado, Mukaddashin Daraktan Yaɗa Labarai da Kididdiga na Kotun Ɗaukaka Ƙara ta Shari'a, ritaya ta tilas saboda matsaloli da suka shafi takardun karatunsa da kuma shigar sa Makarantar Koyon Aikin Lauyoyi ta Najeriya.

A wani mataki na ladabtarwa, an rage wa Alƙali Usman Haruna Usman, Alƙalin Babbar Kotun Shari'a ta Goron Dutse, matsayi da mataki ɗaya saboda sakaci bayan ya bari an tura kuɗaɗen sayar da wata kadarar gado zuwa asusun wani jami'in kotu. An kuma yi masa gargaɗi tare da tabbatar da dakatar da shi daga gudanar da ayyukan shari'a.

Haka kuma, Alƙali Abdullahi Wayya na Babbar Kotun Shari'a ta Kasuwa ya samu gargaɗi saboda sakaci wajen sa ido kan tsarin beli wanda ya kai ga sakin wani wanda bai kamata a saki ba.

Hukumar ta kuma miƙa Sufeto Shehu Adamu ga Kwamishinan 'Yan Sanda domin gudanar da bincike kan zargin yaudarar kotu game da sharuɗɗan beli. Haka nan ta ba da umarnin ci gaba da bincike kan rawar da magatakardan kotu Salmanu Zubairu da Ahmad Kabir suka taka wajen sarrafa takardun belin.

A gefe guda kuma, Hukumar ta soke matakin da ta ɗauka a baya kan Mai Shari'a Umar Sunusi Danbaba (PhD) bayan sabbin takardu sun nuna cewa Kwamitin Karɓar Korafe-korafen Ma'aikatan Shari'a bai ba da shawarar a dakatar da shi ba. Saboda haka, an mayar da shi bakin aikinsa tare da dawo masa da albashi da sauran haƙƙoƙinsa.

Hukumar ta sake jaddada aniyarta na tabbatar da gaskiya, riƙon amana da ɗa'a a harkokin shari'a a Jihar Kano.

• Tweet
• Share
• Share
• Share
• Share