Kotun Ɗaukaka Ƙara Ta Tabbatar da Haramcin Sanya Hijabi a Makarantar ISI ta Jami'ar Ibadan.

Kotun Ɗaukaka Ƙara da ke zamanta a Ibadan ta soke hukuncin Babbar Kotun Jihar Oyo da ta bai wa ɗalibai Musulmi damar sanya hijabi a matsayin wani ɓangare na kayan makaranta a International School, University of Ibadan (ISI).

A hukuncin da alkalai uku suka yanke, inda biyu suka amince ɗaya kuma ya yi sabani, kotun ta bayyana cewa ISI makaranta ce mai zaman kanta, saboda haka tana da ikon tsarawa da aiwatar da dokokin tufafin makaranta.

Kotun ta kuma ce hukuncin Kotun Koli da ya amince da sanya hijabi a makarantun gwamnati ba ya shafar makarantu masu zaman kansu kamar ISI.

Shari'ar ta samo asali ne bayan ɗalibai 11, tare da goyon bayan ƙungiyar Muslim Rights Concern (MURIC), sun ƙalubalanci dokar makarantar da ta hana sanya hijabi. Babbar Kotun Jihar Oyo ta yanke cewa dokar ta tauye musu 'yancin addini da kuma 'yancin da kundin tsarin mulkin Najeriya ya ba su.

Sai dai mahukuntan makarantar sun ɗaukaka ƙara.

Mai shari'a Biobele Georgewill, wanda ya jagoranci hukuncin, tare da goyon bayan Mai shari'a K. I. Amadi, ya ce ɗaliban sun amince da bin dokokin makarantar, ciki har da tsarin tufafi da lokacin da suka yi rajista.

Ya ƙara da cewa Kotun Koli ta amince da sanya hijabi ne kawai a makarantun gwamnati, amma har yanzu ba ta yanke hukunci kan amfani da hijabi a makarantu masu zaman kansu ba.

A nasa ra'ayin na sabani, Mai shari'a Fadawu Umar ya ce ƙarar ba ta da tushe kuma ya kamata a tabbatar da hukuncin Babbar Kotun.

Bayan hukuncin, mahukuntan makarantar ISI sun sanar da iyaye da masu kula da ɗalibai cewa daga ranar Litinin, 6 ga watan Yuli, 2026, ba za a ƙara bari wani ɗalibi ya sanya hijabi ko mayafin kai tare da kayan makaranta ba, tare da buƙatar iyaye su tabbatar 'ya'yansu sun bi sabon umarnin.

• Tweet
• Share
• Share
• Share
• Share